كتب / عصام السيد شحاتة
في وسط زحمة الحياة والضغوط اللي بنواجهها كل يوم، بننسى أحيانًا إن ربنا هو اللي بيدبر كل حاجة. “يدبر الأمر” مش مجرد كلمات، دي حقيقة إلهية بتطمئن القلوب اللي مليانة قلق وخوف. تخيل معايا: وأنت تحارب قلقك اللي مش عارف تنام عليه، ربنا بيدبر أمرك بهدوء، بيحل المشكلات قبل ما تشوفها.
يدبر أمرك بينما أنت غارق في أفكارك اللي مش عارف تخرج منها، بيرسم خطط أحسن مما نتخيل، عشان يخرجك من الدائرة دي أقوى وأكتر يقينًا. يدبر أمرك بينما تخشى وقوع مخاوفك، وأنت شايف الظلام حواليك، هو اللي بيبدل الخوف بأمل، وبيحول اللي خايف منه لفرصة جديدة.
حتى لما تكون في تمام الضياع، ومش عارف الطريق أمامك، ومع ذلك في يقين الرجوع إليه، ربنا بيدبر أمرك بكل حكمة، لأنه أعلم منك بحالك، يعرف اللي جوا قلبك قبل ما تقوله، ويعرف اللي هيحصل قبل ما يحصل.
ده تذكير إننا مش لوحدنا أبدًا، ربنا دائمًا معانا، بيحضن همومنا ويحولها لخير. خليك مطمئن، صلي وادعي، وثق إنه هيفتح أبواب الفرج من حيث ما تتوقع. ربنا يريح قلوبنا، يفرج همنا ويملأ حياتنا بالسكينة والأمان
